நான் கற்பழிக்கப்பட்டவருக்கு ஆதரவளிப்பது எப்படி?

உங்கள் தோழி கற்பழிக்கப்பட்டிருந்தால், அவர் பல்வேறு உணர்ச்சிக் கொந்தளிப்புகளினால் நிலைகுலைந்து போயிருப்பார்.   அவர் மௌனம் காத்து தன்னைத் தனிமைப்படுத்திக் கொள்ளக்கூடும், அல்லது வெறிபிடித்தது போல் நடந்துகொள்ளலாம். சிரிப்பது, ஆத்திரப்படுவது, எதிலும் ஈடுபாடில்லாமல் இருப்பது அல்லது அதிர்ச்சி போன்ற உணர்வு அலைக்கழிப்புகளுக்கு ஆளாகலாம்.  கற்பழிக்கப்பட்ட ஒவ்வொருவரும் வெவ்வேறு விதமாக தனக்கு நிகழ்ந்த கொடூரத்தைக் கையாளுகின்றனர்.  தன்னை யாரும் நம்பமாட்டார்கள் என்ற பயம் கற்பழிக்கப்பட்ட பெண்களைத் தொற்றிக்கொள்கிறது.

கற்பழிக்கப்பட்டவர் அதனைத் தாமதமாகப் புகார் செய்வதற்கு இதுவும் ஒரு காரணமாகும். ஆகையால், முதலில் நீங்கள் கற்பழிக்கப்பட்டவரை நம்புவது முக்கியம்.  கற்பழிக்கப் பட்டவர் சக்தியிழந்து விட்டோம் என்ற உணர்வால் உந்தப்பட்டு, தாழ்வு மனப்பான்மையால் துவண்டுபோயிருக்கலாம். அவரை நம்பும்பொழுது நீங்கள் அவருக்கு ஊக்கமளிக்கிறீர்கள். அவர் சொல்வதைச் செவிமடுத்துப் புரிந்துகொண்டு உதவி செய்ய முடியும்.

சூழ்நிலையை முடிந்தவரையில் சரியாகத்தான் கையாண்டு உள்ளார் என்று கற்பழிக்கப்பட்டவருக்கு நம்பிக்கையூட்டுங்கள்.  நிலைகுலைவிலிருந்து அவர் வெளியாகக் காவல்துறை புகார், மருத்துவ பரிசோதனைகள் மற்றும் ஆலோசனை சேவைகள் பற்றிய தகவல்களை அளியுங்கள்.  நீங்கள் சொல்வதையெல்லாம் அவர் நினைவில் நிறுத்த முடியாத நிலையில் இருக்கலாம்.  இது இயல்புதான்.  இதே தகவல்களை நீங்கள் அவருக்குத் திரும்பக் கூறலாம்.  விரைவில் முடிவெடுக்குமாறு கற்பழிக்கப்பட்டவருக்கு நீங்கள் அழுத்தம் கொடுக்கக்கூடாது.

நீங்கள் செய்ய வேண்டியவை வருமாறு:

• அவர் சொல்வதைக் காது கொடுத்து கேளுங்கள்.
• அவரை நம்புங்கள்.  கற்பழிக்கப்பட்டவருக்குத் தான் சொல்வதை மற்றவர் நம்புகிறார் என்று தெரிந்துகொள்வது முக்கியமானதாகும்.  ஏனெனில் கற்பழிக்கப்பட்டதாகப் பொய் சொல்பவர் மிகக் குறைவு.
• அவருக்கு நடந்த கற்பழிப்பை உங்களுக்கு அறிவித்ததற்கு நன்றி தெரிவியுங்கள். நடந்தனவற்றைப் பகிர்ந்துகொள்வது எவ்வளவு சிரமமானது என்று உங்களுக்குப் புரிகிறது என்று அவருக்கு அறிவியுங்கள்.
• கற்பழிப்பு அவர் குற்றமல்ல என்று ஆதரவாகப் பேசுங்கள்.  கற்பழிப்பைத் தூண்டுவதற்கு அவர் எதையும் செய்யவில்லை. எந்தப் பெண்ணும் கற்பழிக்கப்படக்கூடாது. கற்பழித்தவர் மட்டுமே இதில் முழுக்கக் குற்றம் புரிந்தவர்.
• அவருடைய சுயமதிப்பு முக்கியமானது என்று வலியுறுத்தி, கற்பழிப்பை எதிர்கொண்டிருக்கும் அவருடைய மனோவலிமைக்கு உங்கள் மரியாதையை வெளிப்படுத்துங்கள்.
• அவருடைய முடிவுக்கு மதிப்பளித்து அவர் சொந்த தேர்வுகளைச் செய்ய அனுமதியுங்கள்.
• காவல்துறையில் புகார் கொடுக்க ஊக்கமளியுங்கள். அல்லது பெண்கள் மறுமலர்ச்சி நிலையம் (WCC) போன்ற பெண்கள் அமைப்புகளின் ஆலோசகரோடு தொடர்புகொண்டு பேச ஏற்பாடு செய்யுங்கள்.  பாலியல் தாக்குதல்களுக்கு உள்ளாகும் ஒவ்வொரு பெண்ணும் அதற்கு வெவ்வேறு விதமாக எதிர்வினை ஆற்றுவர். அவமானம், தன்னையே நொந்துகொள்ளுதல், பயம், காயம் போன்ற உணர்ச்சி வெளிப்பாடுகள் தீவிரமாக வெளிப்படுவதால், அதற்கு சிகிச்சை அளிப்பதற்கு முன்பதாக அதன் முழுத்தாக்கத்தையும் புரிந்துகொள்ள வேண்டும்.  இதற்கு அனுபவமிக்க ஆலோசகரின் உதவியை நாடவேண்டும்.

அடிக்கடி கேட்கப்படும் கேள்விகள்

கற்பழிப்புக்கும் உடலுறவுக்கும் உள்ள வேறுபாடுகள் என்ன?
கற்பழிப்பு என்பது உடலுறவு அல்ல. அது ஒரு வன்முறைசெயல் மற்றும் கடுமையான குற்றமாகும்.  மாறாக உடலுறவு என்பது துணைகள் இருவரின் பரஸ்பர சம்மதத்தோடு நடைபெறுகிறது.

சட்டப்பூர்வமான கற்பழிப்பு என்றால் என்ன?
16 வயதுக்குக் கீழ்ப்பட்ட ஒரு பெண்ணோடு, அவரின் சம்மதத்தோடு அல்லது சம்மதம் இல்லாது உடலுறவு கொள்வது சட்டப்பூர்வமான கற்பழிப்பு என்று கருதப்படும்.

ஏன் ஆண்கள் கற்பழிக்கிறார்கள்?
ஆண்கள் தங்களுடைய காமத்தைக் கட்டுப்படுத்த முடியாதவர்கள் என்ற தவறான கருத்து பரவலாக உள்ளது. ஆனால், உண்மையில் கற்பழிப்பு என்பது பாலியல் ஈர்ப்பு மற்றும் இச்சை சம்பந்தப்பட்டது அல்ல – அது ஒரு பெண்ணின் மீது செலுத்தப்படும் அதிகாரம் மற்றும் அடக்குமுறை ஆகும்.  அந்த அதிகாரம் மற்றும் அடக்குமுறையை வெளிப்படுத்துவதற்கு ஒரு பெண்ணின் உடல் பாலுறவு ஆயுதமாகப் பயன்படுத்திக் கொள்ளப்படுகிறது.

இதர பாலியல் குற்றங்களிலிருந்து கற்பழிப்பு எப்படி வேறுபடுகிறது?
ஒரு பெண்ணின் சம்மதம் இல்லாமல் அவள் பிறப்புறுப்பில் ஆண்குறி செலுத்தப்படுவதைச் சட்டம் கற்பழிப்பு என்கிறது. பெண்களும் ஆண்களும் வேறு வழிகளிலும் பாலியல் தாக்குதல்களுக்கு ஆளாகலாம்.  உதாரணத்திற்கு, வாய், ஆசனவாய் வழி உறவுக்குக் கட்டாயப்படுத்துதல் மற்றும் இதர விருப்பமில்லாத பாலியல் தொடுதல்கள்.  பாலியல் தாக்குதல், முறையிலா புணர்ச்சி, மானபங்கப்படுத்துதல் போன்றவற்றின் கீழ் உள்ள தண்டனைச் சட்டத்தின் வாயிலாக, குற்றமிழைத்தவர் குற்றஞ்சாட்டப்படுவார்.

கற்பழிப்பினால் நீங்கள் கருத் தரிக்கவோ அல்லது உங்களுக்குப் பாலியல் நோய் பாதிப்போ ஏற்படுமா?
ஆம், கற்பழிக்கப்படும் பட்சத்தில் உங்களுக்கு கருத்தரித்தல் மற்றும் பாலியல் நோய் பாதிப்புகள் உருவாகலாம். குறிப்பாகக் கற்பழிக்கும்பொழுது ஆணுறை பயன்படுத்தப்படாமல் இருந்திருந்தால் பாதிப்புகள் அதிகம். அரசாங்க மருத்துவமனைகளில் உள்ள அவசர சிகிச்சைப் பிரிவில் உங்களைப் பரிசோதித்துக்கொள்ளுங்கள் மற்றும் கற்பழிப்பு தொடர்பான பொலிஸ் அறிக்கையையும் செய்யுங்கள்.

தன்னைக் கற்பழித்தவனைப் பெண்கள் திருமணம் செய்துகொள்ள வேண்டுமா?
சில சமயங்களில் கற்பழித்தவனையே திருமணம் செய்துகொள்ளுமாறு பெண்களுக்கு அழுத்தம் கொடுக்கப்படலாம். அதுவும் பெண் கர்ப்பம் தரித்திருந்தால் இவ்வாறு செய்யலாம்.  கற்பழித்தவனைத் திருமணம் செய்துகொள்ளுமாறு யாரையும் கட்டாயப்படுத்தக்கூடாது.  கற்பழித்தவனைத் திருமணம் செய்துகொள்ளும் பெண், திருமணத்திற்குப் பிறகு தொடர் பாலியல் வன்முறைகளுக்கு ஆளாகக்கூடும்.

கற்பழிக்கப்பட்ட ஒரு பெண் அதற்குப் பிறகு திருமணம் செய்துகொள்ளலாமா?
ஆம். கற்பழிக்கப்பட்ட ஒரு பெண் எந்தத் தவற்றையும் செய்யவில்லை.  மொத்த தவறும் கற்பழித்தவனுடையதுதான் என்பதனை இங்கு நினைவில் கொள்ள வேண்டியது அவசியம்.  ஆனால் சில சமயங்களில் கற்பழித்தவன் மீது பழி சுமத்துவதற்குப் பதிலாக, பழி கற்பழிக்கப்பட்ட பெண்கள் மீது சுமத்தப்படுகிறது.  ஆகையால், கற்பழிக்கப்பட்ட ஒரு பெண் தன்னுடைய அதிர்ச்சியிலிருந்து மீண்டு, இயல்பு வாழ்க்கைக்குத் திரும்ப ஆலோசனைகளை நாடுவது அவசியம்.  தான் நேசிக்கும் வேறொருவரைத் திருமணம் செய்துகொண்டு குழந்தை பெற்றுக்கொள்ளலாம்.

கற்பழிப்பு தொடர்பான புத்தகங்கள், சுவரொட்டிகள் மற்றும் துண்டுப்பிரசுரங்கள் மற்றும் வீடியோக்களைக் காணவும்.

கற்பழிப்பு முகப்புப்பக்கத்திற்குத் திரும்பு