சிறார் பாலியல் கொடுமையைப் புகார் செய்தல்

காவல்துறையின் உதவியைப் பெறுதல்

சிறாருக்கு எதிரான பாலியல் குற்றங்கள் சட்டம் 2017 (Sexual Offences Against Children Act 2017) நிறைவேற்றப்பட்ட பிறகு, எந்தவொரு சிறார் பாலியல் கொடுமை சம்பவத்தையும் புகார் செய்ய வேண்டியது கட்டாயமாக்கப்பட்டுள்ளது.  இல்லாவிடில் ஒருவர் தண்டனைக்கு உள்ளாகலாம்.

சந்தேகத்திற்குரிய நபர் மீது சட்ட நவடிக்கை எடுக்கும் பொருட்டு, கொடுக்கப்பட்ட புகாரை விசாரணை செய்து அதற்கான ஆதாரங்களைத் திரட்டுவது காவல்துறையின் பணியாகும்.

1. பாலியல் கொடுமைக்கு உள்ளான அல்லது பாலியல் கொடுமைக்கு ஆளானதாக சந்தேகிக்கப்படும் சிறாரை, புகார் அளிப்பதற்காக வயதில் முதிர்ந்தவர் காவல் நிலையத்திற்கு அழைத்துச் செல்ல வேண்டும்.  பாலியல் கொடுமை எங்கு நிகழ்ந்திருந்தாலும், எந்தக் காவல் நிலையத்திலும் புகார் அளிக்கலாம். சிறாருடன் துணை வரும் அளிப்பதற்காக வயதில் முதிர்ந்தவர், சிறாரின் அம்மா/அப்பா/பாதுகாவலர் அல்லது எந்த ஒரு நம்பிக்கைக்குரியவராக (உறவினர், ஆசிரியர்) அல்லது சமூகநல அதிகாரியாக இருக்கலாம்.
2. காவல்துறை புகாருக்கு, கீழ்குறிப்பிட்ட தகவல்கள் தேவைப்படுகின்றன:
   
   • எப்பொழுது: எப்பொழுது நடந்தது? – சம்பவம்/சம்பவங்கள் நடந்த தேதி மற்றும் நேரம்
   • எங்கு: எங்கு நடந்தது? – சம்பவம்/சம்பவங்கள் நடந்த இடம்
   • என்ன மற்றும் எப்படி: என்ன சம்பவம் நடந்தது, எப்படி நடந்தது மற்றும் எத்தனை முறை நடந்தது? – சம்பவம்/சம்பவங்களின் விபரங்கள்
   • யார்: யார் இதில் சம்பந்தப்பட்டது மற்றும் குற்றஞ்சாட்டப்பட்ட பாலியல் வன்முறையாளர் யார்?
   • பாதிப்பு: சம்பவத்திற்குப் பிறகு சிறாருக்கு ஏற்பட்ட பாதிப்புகள் என்ன?  காயம், சிராய்ப்பு, இன்னும் பல.
   • ஏன்: ஏன் புகார் செய்யப்படுகிறது? பாதிக்கப்பட்டவருக்கு பாதுகாப்பு கொடுக்க வேண்டும் என்பதற்காக, காவல்துறை நடவடிக்கை எடுக்க வேண்டும் என்பதற்காக, இன்னும் பல.
3. கூடுதல் விசாரணை மேற்கொள்ளும் பொருட்டு, மாவட்ட காவல் நிலையத்தின் பாலியல், பெண்கள் மற்றும் சிறார் விசாரணைப் (D11) பிரிவிலிருந்து விசாரணை அதிகாரி (IO – Investigating Officer) ஒருவர் நியமிக்கப்படுவார்.  இவர் புகாரைப் பதிவு செய்த பிறகு பாதிக்கப்பட்ட சிறாரை அரசாங்க மருத்துவமனையின் அவசர சிகிச்சைப் பிரிவுக்குக் கொண்டு செல்வார்.
4. அரசாங்க மருத்துவமனையின் அவசர சிகிச்சைப் பிரிவில், One Stop Crisis Centre (OSCC) என்ற தனி அறையில் சம்பந்தப்பட்ட சிறாருக்கு விசாரணை அதிகாரியின் முன்னிலையில் மருத்துவ பரிசோதனை மேற்கொள்ளப்படும். காவல்துறையின் புகாரை அடிப்படையாகக் கொண்டு, விசாரணை அதிகாரி கூடுதல் விசாரணைகளை மேற்கொள்வார் (எ.கா: சந்தேகத்திற்குரியவரையும் சேர்த்து இதில் சம்பந்தப்பட்ட எல்லோரிடமிருந்தும் வாக்குமூலத்தைப் பதிவு செய்தல், கூடுதல் ஆதாரங்களைத் திரட்ட சம்பவம் நடந்த இடத்திற்குச் செல்லுதல், இன்னும் பல)
5. விசாரணை நடக்கும்பொழுது சந்தேகத்திற்குரிய நபர் தடுத்து வைக்கப்படலாம்.
6. விசாரணையின் முடிவுகளை, விசாரணை அதிகாரி அரசு வழக்கு விசாரணை அலுவலகத்தில் சமர்ப்பிப்பார். சந்தேகத்திற்குரிய நபர் இழைத்த கொடுமைக்கு அவர் குற்றஞ்சாட்டப்படுவாரா என்பதனை விசாரணை அலுவலகம் முடிவு செய்யும்.  போதுமான ஆதாரங்கள் இருக்குமானால், சந்தேக நபர் நீதிமன்றத்தில் குற்றஞ்சாட்டப்படுவார்.  இல்லாவிடில் அவர் விடுவிக்கப்படுவார்.
7. பாலியல் கொடுமை விளக்கமளிக்க முடியாத குழந்தைகளுக்காக, குழந்தை பேச்சு மையம் (Child Interview Centre, CIC) ஏற்பாடு செய்யப்படும். இது, குழந்தைகள் தங்கள் கதையை பாதுகாப்பாக மற்றும் சௌகரியமாக பகிர்ந்து கொள்ள இடமாக வடிவமைக்கப்பட்டுள்ளது.

அரசாங்க மருத்துவமனையின் உதவியைப் பெறுதல்

1. காவல் நிலையத்திற்குச் செல்லாமல், நீங்கள் சம்பந்தப்பட்ட சிறாரை நேரடியாகவே எந்தவொரு அரசாங்க மருத்துவமனையிலும் உள்ள அவசர சிகிச்சைப் பிரிவின் பதிவு முகப்புக்கு கொண்டு செல்லலாம்.
2. சம்பந்தப்பட்ட சிறாருக்கு மருத்துவ பரிசோதனை செய்வதற்கு முன்பதாக மருத்துவமனையில் உள்ள காவல்துறை முகப்பில் நீங்கள் புகார் செய்ய வேண்டும்.
3. சம்பந்தப்பட்ட சிறார், மருத்துவக் கவனிப்பு மற்றும் பரிசோதனைக்காக உள்ள One Stop Crisis Centre (OSCC) என்ற பிரத்தியேக அறைக்குக் கொண்டு செல்லப்படுவார். அங்கு அவருக்கு சிராய்ப்பு அல்லது காயங்களுக்குச் சிகிச்சை அளிக்கப்படும்.
4. மருத்துவமனையில் உள்ள, ‘சந்தேகத்திற்குரிய சிறார் கொடுமை மற்றும் புறக்கணிப்புக் குழு’ (SCAN Team)* சிறாரைப் பரிசோதிக்கும்.  பரிசோதனை, இரத்தம் எடுத்தல், மற்றும் எல்லா உருமாதிரி (specimen) சேகரிப்புகளும், OSCC-யில் மேற்கொள்ளப்படும்.  சேகரிக்கப்பட்ட உருமாதிரிகள் விசாரணைக்காகக் காவல் துறையினரிடம் கொடுக்கப்படும். OSCC-யில் பரிசோதனை முடிவடைந்த பிறகு, குழந்தை அல்லது மகளிர் நோய்ப் பிரிவில், சம்பந்தப்பட்ட சிறார் அனுமதிக்கப்படுவார்.
5. தொடர் நடவடிக்கை எடுக்கும் நோக்கத்திற்காக, இந்த விசாரணை அறிக்கை, சிறாரைப் பரிசோதித்த மருத்துவரின் பார்வைக்கு அனுப்பி வைக்கப்படும்.  மருத்துவர், சிறாரைச் சமூகப் பணியாளர் மற்றும் சிறார் மனநல மருத்துவரின் பார்வைக்குக் கொண்டு செல்வார்.  சம்பந்தப்பட்ட சிறார், சமூக நல இலாகா மற்றும் அரசு சாரா நிறுவனங்களுக்கும் கொண்டு செல்லப்படுவார்.  மருத்துவமனையில் அனுமதிக்கப்பட்ட சிறாருக்கு மருத்துவ சிகிச்சை மற்றும் ஆலோசனையும் வழங்கப்படும்.  சந்தேகத்திற்குரிய நபர் சிறாரோடு ஒரே வீட்டில் குடியிருந்தவராக இருந்தால், சிறார் குணமாகி வீட்டுக்குச் செல்லத் தயாராகும்பொழுது, அவர் பாதுகாப்பான வேறு இல்லத்தில் தங்குவதை உறுதி செய்யும் பொறுப்பு மாவட்ட சமூகநல அதிகாரியினுடையது.

*ஒவ்வொரு அரசாங்கம் மருத்துவமனையிலும் ‘சந்தேகத்திற்குரிய சிறார் கொடுமை மற்றும் புறக்கணிப்புக் குழு ‘(Suspected Child Abuse and Neglect (SCAN) Team) இருக்கிறது.  இவர்கள் சிறார் பாலியல் கொடுமை சம்பவங்களைக் கண்காணிக்கிறார்கள்.   இந்தக் குழுவில் குழந்தை மருத்துவர்கள், மகப்பேறு மருத்துவர்கள், மருத்துவ சமூகப் பணியாளர்கள் மற்றும் மனநல மருத்துவர்களோடு சேர்த்து அவசர சிகிச்சைப் பிரிவின், One Stop Crisis Centre (OSCC) மருத்துவர் மற்றும் தாதியரும் இருப்பர்.

சமூக நல இலாகாவின் உதவியைப் பெறுதல்

நீங்கள் சம்பவத்தைச் சமூகநல இலாகாவிலும் புகார் செய்யலாம். சமூகநல இலாகாவில் உள்ள சிறார் பாதுகாப்பாளர் (Pegawai Pelindung Kanak-Kanak) சிறாரின் பாதுகாப்பு மற்றும் நலனை உறுதி செய்வார்.

1. சிறார் கொடுமை சம்பவம் சமூக நல இலாகாவில் புகார் செய்யப்படும் பட்சத்தில், புகார் கிடைத்த பிறகு, அந்தச் சிறார் பாதுகாப்பாளரால் அரசாங்க மருத்துவமனையின் அவசர சிகிச்சைப் பிரிவின் One Stop Crisis Centre (OSCC) கொண்டு செல்லப்பட்டு, பிறகு அவர் பாலியல் துன்புறுத்தலுக்கு உள்ளாகியுள்ளாரா என்பது மருத்துவப் பரிசோதனையின் மூலம் உறுதி செய்யப்படும். சிறார் பாதுகாப்பாளர் அல்லது பொறுப்பாளர் முதலில் அங்குள்ள காவல்துறை முகப்பில் புகார் அளிக்க வேண்டும்.
2. பிறகு அந்தச் சிறார், மருத்துவ பரிசோதனைக்காக மருத்துவமனையில் அனுமதிக்கப்படுவார்.  சிறார் மருத்துவமனையிலிருந்து வெளியேறிய பிறகு, குழந்தை பாதுகாப்பாளர், சிறார் நலமாக இருப்பதை உறுதி செய்வதற்கும், தேவைப்பட்டால் சிறாருக்கும் அவருடைய பெற்றோருக்கும் ஆலோசனைகளை வழங்குவதற்கும் நீதிமன்ற உத்தரவோடு, அவருடைய வீட்டிற்கு வருகை புரியலாம்.